சிவபெருமான் ஓயாது திருநடனம் புரிந்துகொண்டிருக்கின்றார். ஒவ்வொரு உயிரிலும், உயிரற்ற பொருள்களிலும் அவர் கலந்து நின்று திருநடனம் புரிகின்றார். அந்த நடனமே உலகில் உயிர்களின் இயக்கத் துக்குக் காரணமாக இருக்கிறது.
சூரியன், சந்திரன், அக்னி ஆகிய முச்சுடர் மண்டலங்களின் நடுவிலும் உமையொருபாகனாக நின்று சிவபெருமான் ஆடும் நடனங்கள் தனிச்சிறப்புடன் போற்றப்படுகின்றன.
ஞான தாண்டவம்: சூரிய மண்டலத்தில் நின்று நடனம்புரிவது சிவ மகா புராணத்தில் விரிவாகக் கூறப்பட்டுள்ளது. நான்கு முகங்களும் எட்டுக் கரங்களும் கொண்டு அர்த்தநாரீஸ்வரராக அவர் ஆடுகின்றார். இது உயிர்களுக்கு ஞானத்தை நல்கி அறிவைப் பிரகாசிக்க வைக்கும் தாண்டவமாகும்.
இதுவே 'ஞான நடனம்’ எனப்படும். தாராசுரம் ஐராவதீஸ்வரர் ஆலயக் கோட்டம், திருவண்ணாமலை, சிதம்பரம் கோபுரங்களின் கோட்டங்களில் இவரைத் தரிசிக்கலாம். இவரை நடனக் கோலத்தில் அமைக்காமல் நின்ற நிலையில் அமைத்துள்ளனர்.
அமுதத் தாண்டவம்: சிவனார் சந்திரனின் நடுவில் நின்று ஆடுவது அமுதத் தாண்டவம் ஆகும். இதனால், உயிர்கள் அழியாத நிலைப்பேற்றைப் பெறுகின்றன. இதில் பெருமான் வலது கை அபயம் காட்ட, இடது கையை (அம்பிகை போல்) தொங்கவிட்டுக் கொண்டிருக்கின்றார். இக்காட்சியை ஆரணி காமக்கூர் எனும் தலத்தில் தரிசிக்க இயலும்.
முக்தி தாண்டவம்: சிவபெருமான் உயிர்களுக்கு அழியாத முக்தி ஆனந்தத்தை அருளும் திருநடனத்தை அக்னி மண்டலத்தின் நடுவே நின்று ஆடுகிறார். அதுவே முக்தி நடனம் எனப்படும். அதை அவர், கார்த்திகைத் தீப நாளில் திருவண்ணாமலையில் ஆடுகிறார். இதை உணர்த்தும் ஐதீகக் காட்சி கார்த்திகைத் தீபத் திருநாளில் திருவண்ணாமலையில் நடத்தப்படுகின்றது.
No comments:
Post a Comment