சிவனருள் கைகூடும் ! ஆன்மிக தகவல்கள்...!

சென்னை திருநின்றவூர் அருகேயுள்ள புலியூர் அருள்மிகு அகஸ்தீஸ்வரர் கோயிலில், ஆனி உத்திரத்தன்று ஸ்வாமி அம்பாளுக்கு திருக்கல்யாண வைபவம் நடைபெறும். அப்போது, கல்யாண வரம் பிரார்த்திக்கும் கன்னிப் பெண்களுக்கு தாலிச் சரடும், குழந்தைப்பேறு வேண்டுவோருக்கு எலுமிச்சம் பழமும் வழங்கப்படுகின்றன. அவற்றை வீட்டில் வைத்து, இறைவழிபாடு செய்து வந்தால், விரைவில் நல்லது நடக்கும் என்பது நம்பிக்கை.

சேலம் நகரில் அருள்பாலிக்கும் சுகவனேஸ்வரர், சுரபுரநாதர், வீரட்டேஸ்வரர், பீமேசுவரர் மற்றும் திருவேலிநாதர் ஆலயங்களை பஞ்சாட்சர கோயில்களாகப் போற்றி வழிபடுகின்றனர்.

நாமக்கல் குகைக்கோயிலில் சிவன் பாதி விஷ்ணு பாதியாக காட்சியளிக்கும் ஈஸ்வரன், நாகத்தைக் கையில் ஏந்தியபடி அபூர்வ கோலத்தில் அருள்பாலிக்கிறார்.

சிவகங்கை மாவட்டம், பிரான்மலை அற்புதமான ஸ்தலம். திருக்கொடுங்குன்றம் என்பது இதன் தேவாரப் பெயர். இந்த மலையின் உச்சியில் மருதுபாண்டியர் காலத்துக் கோட்டையும் அதில் பீரங்கியும் உள்ளன. வள்ளல் பாரி ஆட்சிக்கு உட்பட்டிருந்த பகுதி இது. அவன் முல்லைக்குத் தேர் கொடுத்த இடம் இவ்வூரிலிருந்து சுமார் ஒரு கி.மீ. தொலைவில் உள்ளது.

பொதுவாக சிவாலயங்களில் அருள்மிகு நடராஜருடன் பதஞ்சலி, வியாக்ரபாதர், காரைக்கால் அம்மையார் ஆகியோர் காட்சியளிப்பர். ஆனால் மயிலாடுதுறை மயூரநாதர் கோயிலில், நடராஜ பெருமான் ஜுரதேவருடன் இருக்கிறார். மயில் வடிவம் எடுத்து சிவன் நடனம் ஆடியதால் இங்குள்ள நடராஜரை மயூர தாண்டவ நடராஜர் என்கிறார்கள். இக்கோயிலின் கருவறையின் கோஷ்ட சுவரில் நடராஜருக்கு அருகில் மூன்று கால்களுடன் வித்தியாசமான கோலத்தில் அருள்கிறார் ஜுரதேவர்.

சென்னை -திருவொற்றியூர் தேவாரப் பாடல் பெற்ற திருத்தலம். இங்குள்ள தியாகராஜர் ஆலயத்தில், பாம்பரசர்கள் வழிபட்டு பேறு பெற்றுள்ளனர். கருவறையில் அருளும் சிவபெருமான் வாசுகி என்ற பாம்பை தன் மேனியில் கொண்டிருப்பதால், படம்பக்க நாதர் என்று அழைக்கப்படுகிறார். ஆதிசேஷனும் இந்தத் தலத்தில் ஆயிரம் லிங்கம் அமைத்து வழிபட்டுள்ளான். இந்த ஆலயத்தில் உள்ள சகஸ்ரலிங்கத்தைத் தரிசித்து வழிபடுவதால், சிவனருள் கைகூடும்; சகல செளபாக்கியங்களும் கிடைக்கும்.

நவதாண்டவ மூர்த்திகள் !

நாகை மாவட்டம், நாகை வட்டத்தில் அமைந்துள்ளது திருச்செங்காட்டங்குடி. இங்குள்ள சிவாலயத்தில் காணும் பல அற்புதங்களில் குறிப்பிடத்தக்கவை நவதாண்டவ மூர்த்திகளின் தரிசனம். இங்கே வடசுற்று மண்டபத்தில் புஜங்கவளிதர், கஜசம்ஹாரர், ஊர்த்துவ மூர்த்தி, காலசம்ஹாரர், கங்காள மூர்த்தி, பிட்சாடன மூர்த்தி, திரிபுர சம்ஹாரர், பைரவ மூர்த்தி, உத்திராபதியார் ஆகிய நவதாண்டவ மூர்த்திகளையும் தரிசிக்கலாம்.

அம்பிகையின் பாதுகைகள்!

திருவள்ளூர் மாவட்டம், பொன்னேரி வட்டத்தில், புதுவயல் - பெரியபாளையம் வழித்தடத்தில் அமைந்துள்ள ஊர் ஆரணி. சென்னையிலிருந்து வடக்கே சுமார் 42 கி.மீ தொலைவில் உள்ளது. இவ்வூரில் உள்ள அருள்மிகு சம்பங்கி பிச்சாண்டீஸ்வரர் ஆலயத்தில், தெற்கு நோக்கிய வாசல் வழியே நுழைந்தால், அம்பிகை சிவகாமவல்லியின் சந்நிதியை அடையலாம். தண்ணருள் பொங்கும் கண்களில் கருணை பொழிய காட்சி தரும் இந்த அன்னையின் நேர் எதிரே இரு பாதுகைகள் கல்லில் அமைக்கப் பட்டுள்ளன. இவை அன்னை சிவகாமவல்லியின் பாதுகைகள் எனக் கூறப்படுகிறது.

கோயில்களில்  ரதி - மன்மதன்!

திருவாரூர் மாவட்டம் வலங்கைமான் அருகேயுள்ள இனாம் கிளியூர் என்ற கிராமத்தில் காமன் பண்டிகை, திருவிழாவாகக் கொண்டாடப்படுகிறது. இங்கு மன்மதனுக்கு கோயில் உள்ளது.

திண்டுக்கல் அருகேயுள்ள தாடிக்கொம்பு சௌந்தரராஜப் பெருமாள் கோயிலில் உள்ள மன்மதன் சிலைக்கு மஞ்சள் பூசி வழிபட்டால் திருமணப் பேறு கிட்டும் என்பது நம்பிக்கை.

 சேலம் மாவட்டம் ஆறகழூர் தலத்தில், மன்மதன் சிவனின் நெற்றிக் கண்ணால் எரிக்கப்படுவதற்கு முன் ஈசனைப் பூஜித்ததால் இறைவன் அருள்மிகு
காம நாதீஸ்வரர் என்று அழைக்கப்படுகிறார்.

குமார சம்பவம் அதாவது முருகனின் திருஅவதாரம் நிகழ்வதற்காக, ஈசனின் மேல் மன்மதன் மலரம்பு எய்தான். அதனால் சினம்கொண்ட சிவபெருமான் மன்மதனை எரித்தார். இந்த நிகழ்வு நடைபெற்ற இடம் கல்யாண காமாட்சி சமேத மல்லிகார்ஜுனர் கோயில் கொண்ட தர்மபுரியாகும்.

மன்மதன் தேவமாதர்களுடன் சென்று, தவமியற்றிக் கொண்டிருந்த விஸ்வாமித்ரரின் தவத்தைக் கெடுக்கும் விதமாக அவர் மேல் மலரம்பு தொடுத்தான். அதன் பொருட்டு சாபமும் பெற்றான். பிறகு அவன், அம்பர் மாகாளம் சென்று மகாகாள நாதரை வழிபட்டு சாப விமோசனம் அடைந்தான்.

அதிசய சிவன் கோவில்

தஞ்சை மாவட்டம், பட்டுக்கோட்டை அருகில் உள்ள பரன் ஏலக்கோட்டை பொது ஆவுடையார் கோயில், நள்ளிரவு மட்டுமே திறக்கப்படும்; சூரிய உதயத்துக்கு முன்னதாக சந்நிதி அடைக்கப்பட்டுவிடும். எனினும், தட்சிணாயன புண்ணிய காலத்தில், சூரியக் கிரணங்கள் ஸ்வாமியின் திருமேனியில் படர்ந்து வழிபடும் காட்சியைத் தரிசிப்பது மிகவும் புண்ணியம் வாய்ந்ததாகாக் கருதப்படு கிறது. இந்தக் கோயிலில் சுவாமிக்கு அபிஷேகம் செய்த சந்தனமும், வெற்றிலை -பாக்கு தாம்பூலமும் பக்தர்களுக்கு வழங்கப்படுகின்றன. மற்றபடி சிவராத்திரி, ஐப்பசி அன்னாபிஷேகம் போன்ற எந்த வைபவங்களும் இங்கே கொண்டாடப்படுவதில்லை. இந்தக் கோயிலில் இங்கு சிவன் ஆலமரமாக காட்சித் தருவது சிறப்பம்சம்!

ஈர ஆடை வழிபாடு

பொதுவாக ஈர ஆடையுடன் இறைவனை வழிபடக்கூடாது என்பது, நம் முன்னோர்களும் ஞான நூல்களும் வகுத்துவைத்திருக்கும் நெறிமுறையாகும். இதற்கு விதிவிலக்காக அமைந்துள்ள ஆலயம் குமாரக்கோவில்.

குமரி மாவட்டம், தக்கலையில் இருந்து சுமார் 3 கி.மீ. தொலைவில் உள்ளது இந்தக் கோயில். வேளிமலைச் சாரலில் இயற்கைப் பொலிவுடன் திகழும் இந்த ஆலயத்துக்கு வரும் பக்தர்கள், இங்குள்ள திருக்குளத்தில் நீராடி, ஈர ஆடையுடன் இறைவனை வழிபடுவதைக் காணலாம். இங்கு அருள்பாலிக்கும் மூலவர் முருகன், சுமார் 8 அடிக்கும் மேலான உயரத்துடன் பிரமாண்டமாகக் காட்சி தருகிறார்; வள்ளிதேவியின் விக்கிரகம் சுமார் 6 அடி உயரம்!


ஆலயங்களில் உற்சவம் ஏன்?

உற்ஸவம் என்பது ஆலயங் களில் ஏற்படும் நித்ய நைமித்திகக் குறைவுகளைத் தீர்க்கவும், எல்லோ ருக்கும் நன்மை உண்டாகவும் செய்யப்படும் வைபவம் ஆகும். இது சாகல்யம், பாவனம், சாந்தம், மாங்கல்யம் என நான்கு வகைப்படும்.

சாகல்யம்: துவஜாரோகணம் முதல் தீர்த்தவாரி வரையிலும் நடைபெறும் உற்சவம்.

பாவனம்: துவஜாரோகணம் மட்டும் செய்யப்படுவது.

சாந்தம்: துவஜாரோகணமும், காலை உற்சவமும் இல்லாமல் இரவில் மட்டும் உற்சவம் நடத்துவது.

மாங்கல்யம்: காலையில் மட்டுமே நடைபெறும் உற்சவம். இவற்றுள் முதலாவதாகக் கூறப்பட்ட சாகல்யம் ஒன்பது வகையாகத் திகழ்கிறது. அவை: கவுரம், சாந்திரம், சாவித்திரம், கௌமாரம், தைவீகம், பவுநம், பௌதிகம், கணம், சைவம். (ஒரு சில இடங்களில் மாறுபட்ட நியதிகள் உண்டு)


நின்றகோலத்தில் விநாயகர்

பெரும்பாலான தலங்களில் விநாயகரை அமர்ந்த திருக்கோலத்திலேயே தரிசித்திருக்கிறோம். மதுரை மாவட்டம், திருமங்கலத்தில் இருந்து பேரையூர் செல்லும் வழியில் உள்ள மாத்தங்கரை எனும் ஊரில் கோயில் கொண்டிருக்கும் விநாயகர் நின்ற கோலத்தில் அருள்பாலிக்கிறார். வலக் கரத்தில் கோடரியுடன் அருளும் இந்தப் பிள்ளையாரைத் தரிசித்து வழிபட்டால் புத்திர பாக்கியம் கிடைக்கும் என்பது நம்பிக்கை. மதுரையில் இருந்து சாட்டூர் செல்லும் பேருந்துகளில் பயணித்து இவ்வூரை அடையலாம்.


மழலை வரமருளும் படிப்பாயசம்

திருநெல்வேலி மாவட்டத்தில் உள்ளது ஆயக்குடி. இங்கே கோயில் கொண்டிருக்கும் அருள்மிகு பாலசுப்ரமணிய ஸ்வாமிக்கு விசேஷ அர்ச்சனை- ஆராதனைகள் செய்து பழப் பாயசம் நைவேத்தியம் செய்து பிரார்த்தித்துக் கொண்டால், வேண்டுதல் விரைவில் பலிக்கும் என்பது நம்பிக்கை. மேலும், குழந்தை வரம் அருளும் குமரன் இவர் என்று உள்ளம் சிலிர்க்க கூறுகிறார்கள் பக்தர்கள்.


வினைகள் தீர்க்கும் வில்வ மரம்

மதுரை - கன்னியாகுமரி தேசிய நெடுஞ்சாலையில் திருமங்கலம் ரோடு, தனக்கன் குளம் என்ற இடத்தில் அமைந்துள்ளது அருள்மிகு ஆதிகாமாட்சி அம்மன் திருக்கோயில். இங்குள்ள வில்வ மரம் தெய்வ சாந்நித்தியம் மிகுந்தது என்கிறார்கள். இதைத் தொட்டு வணங்கினால் திருமணத் தடைகள் நீங்கும், பிள்ளைப்பேறு இல்லாதவர்களுக்கு பிள்ளை பாக்கியம் கிடைக்கும் என்பது நம்பிக்கை.

பஞ்சபூத திருத்தலங்களில் ஒன்றான சிதம்பரத்தில் திருமூல நாதரே மூலவர். எனினும், நடராஜப்பெருமானே பிரதான மூர்த்தியாகச் சிறப்பிக்கப்படுகிறார். 

மூவர் பாடிய தேவார திருப்பதிகங்கனை உலகுக்குத் தந்த திருத்தலம் இது.

காளஹஸ்தி - காளத்திநாதரின் லிங்கத் திருமேனி சிறப்பு வாய்ந்தது. இதன் அடிப்பாகத்தில் சிலந்தி, இரு யானைத் தந்தங்கள், உச்சியில் ஐந்து தலை நாகம் உருவம், வலக்கண்ணில் கண்ணப்பர்  தமது கண்ணைப் பெயர்த்து அப்பியதைத் தெரிவிக்கும் வடு ஆகியவை காணப்படுகின்றன.

கர்நாடக மாநிலம், ஹுப்ளிக்கு அருகில் உள்ள தலம் திருக்கோகர்ணம். இங்கு அருளும் ஸ்வாமிக்கு மகாபலேஸ்வரர் என்றும், அம்பிகைக்கு தாம்பிர கௌரி என்றும் திருப்பெயர்கள்.  மாசி மாதத்தில் பிரம்மோற்ஸவமும், குறிப்பாக சிவராத்திரி அன்று தேரோட்டம் நடக்கும் தலம் இது. சிவராத்திரி புண்ணிய தலத்தில் இந்தத் தலத்தை தரிசித்து வழிபடுவதை வெகு விசேஷமாகச் சொல்கின்றன புராணங்கள்.

பக்த மார்க்கண்டேயனுக்காக சிவனார் யமனை உதைத்த இடம் திருக்கடையூர். பக்தனுக்காக சிவனார் லிங்கத்தில் இருந்து வெளிப்பட்டது, ஒரு சிவராத்திரியின் மூன்றாம் ஜாமத்தில். ஆக, சிவராத்திரியில் திருக்கடையூர் சென்று வழிபட, ஆயுள்பலம் கூடும்.

சிதம்பரத்தில் இருந்து சுமார் 24 கி.மீ. தொலைவில் உள்ளது ஓமாம்புலியூர். சிவனார் உமையம்மைக்கு ‘ஓம்’ எனும் பிரணவ மந்திரத்தின் பொருளை உபதேசித்த தலம் இது. ப்ரணவ வியாக்ரபுரம் எனவும் திருப்பெயர் கொண்ட இந்தத் தலமும் சிவராத்திரி தரிசனத்துக்கு உகந்தது.

பார்வதிதேவி விளையாட்டாக சிவபெருமானின் கண்களைப் பொத்தியதால் உலகம் இருண்டது; உயிர்கள் வருந்தின.  பின்னர், சிவம் தமது நெற்றிக் கண்ணை திறந்து உலகுக்கு ஒளி தந்தது. எனினும், உயிர்கள் இன்னலுறக் காரணமானதால் ஏற்பட்ட பாவம் நீங்கும் பொருட்டு, அம்பிகை சிவனாரைப் பூஜித்த இடம் காஞ்சிபுரம். உலகம் இருண்டபோது ருத்திரர்கள் இங்கு பூஜை செய்தனர். இந்தக் காரணத்தையொட்டி  ஆனந்த ருத்ரேசம், மகா ருத்ரேசம், ருத்திர கோடிசம் போன்ற ஆலயங்கள் இவ்வூரில் உள்ளன. காஞ்சியின் ஒரு பகுதி முற்காலத்தில் ‘ருத்ர சோலை’ என்றே வழங்கப்பட்டதாம்.

செங்கல்பட்டுக்கு அருகில் உள்ள ஊர் திருக்கழுக்குன்றம். இந்த ஊரை ருத்திரகோடி என்பார்கள். கோடி ருத்ரர்கள் சிவராத்திரி காலத்தில் பூஜை செய்த இடம் இது. எனவே இந்தக் கோயிலை சிவராத்திரி நாளில் வழிபடுவது மிகவும் விசேஷம்.